Moin und Willkommen!

Kreierrennen

Vandag gift dat bold kien Fiskers in dat Watt mehr un mit de Fiskers gahn ok hör “Fahrtügen”, de Kreier, fleuten. Wat’n Glück, dat de Oostfresen de Kreiers nu neet blot mehr för’t Fisken, man ok för Weddstrieden bruken. So hebben wi Hoop, dat de Kreier noit ut disse Wereld verswinnen deit.pikto_kreierrennen

En Kreier is sowat as’n Slee ut Holt, waar man neet mit over Sneei man over de Sliek in’t Watt fahren deit. Daar bünd fröher de Fiskers mit na hör Fuken in’t Watt fahren un hebben hör Fangst na Hus brocht.

Mit en Been huukt man up de Kreier, hett beid Hannen fast an’t Griep un stött sük mit de anner Been krachterg van d’ Grund of. So beweegt man de Kreier. Up de fuchtig Sliek is dat nett an d’ Begünn leep stuur, man is de Kreier eerst an’t Glieden, denn geiht dat ok fell vöruut.

Dat gift nu elke Jahr Weddstrieden in’t Watt mit Kreiers – en Pläseer för mennig Dusend Tokiekers, de an d’ Diek sitten. Dat gaff maal en Minsk, de hett de Dusend Kilometers Dieken dat gröttste Stadion van de Wereld nöömd. Un villicht mag dat ja maal wesen, dat dat en Kreier-Formel-1 gift…

Nee, dat was blot en Jux. Denn dat Watt is ja vandag de “Nationaalpark Wattenmeer”.