Moin!

MoewenWappen_900x900

De Böskupp van Oostfreesland gift dat nu al langer as teihn Jahren. Hör Begünn geiht torügg up Butenoostfresen in Ilmenau un Griepswold (beid Steden in de Bunnesrepublik Dütskland), de daar oostfreeske Butenlandsvertredens grünndt harren. Man to de Tied wassen disse lüttje Kontoren blot elk in hör Stadt togang.
 
De Sinn un Zweck van disse Böskuppen was nettso as van elk anner Böskupp up disse Wereld un hett sük ok bit vandag neet annert:

  • Vertreden van oostfreeske Interessen in’t Butenland,
  • Verbreden van d’ oostfreeske Kultuur buten Oostfreesland
  • un neet uplesd dat Stönen van utwannert Butenoostfresen in hör frömd Tohuus.

Besünners dit lesd Stee hett faken sörgt, dat de butenlandske Minsken sük wunnerden. Elke Butenoostfrees sall d’r wall tostimmen, dat dat Leven in’t Butenland faken leep stuur is. Dat fangt bi’t Lengen na Huus an un geiht over d’ Gebreck van Oostfresentee bit hento de Verlüss van de Umtreck in de Moderspraak. De Böskupp van Oostfreesland was un is d’r alltied achteran, all de Butenoostfresen daar bitostahn.
 
ausweis1Siet 1997 deit de Böskupp för dit Begehr en Webstee bedrieven (disse hier). De Mögelkheiden van dat Internet maken de dagelk Wark bi de Böskupp heel’n Bült lichter. To’n Bispööl mussden fröher de Oostfresenutwiesen noch van de Lüü bi d’ Böskupp mit egen Hannen tosamentütert worden. Nu maakt dat de Elektronik vansülvst un achteran könen de Utwiesen runnerladen worden. So blifft dat mall Wark van’t utprentjen, utsnieden un tosamenbacken bi de Andragsstellers. Siet de Tied sehen de Utwiesen seker ok beter un akraat ut. 
fahneauffemkopf 
 
In d’ verleden Tied hett sük se Böskupp ok alltied as’n fixen Drievraad van de politisk Verlopen in Europa ruutstellt. So hebben wi hier al siet 1997 en Fraagboog för’t Inbörgern. Sowat maken uns Nahbers in de Nederlannen un Dütskland eerst siet 2006 för hör Inwannerslüü.
 
Ok in Tokunfst sall de Böskupp van Oostfreesland hör Anbodd wieder utbauen. För Vörslagen van jo bünd wi alltied open un wi wassen heel blied, wenn ji uns en Naricht tostüren deen. 

de Oostfreeske Böskupp