Pultstockspringen

In d’ Hammerk van Oostfreesland lopen allerwegens Sloten un Depen dwars un dweer, umdat dat Water ut dat Land wegföhrt worden mutt. Well van de Wegen mit de mennig lüttje Brüggen offkummt, de hett en Probleem. Dat harren fröher ok de Oostfresen un so hebben se sük wat utdocht: dat Pultstockspringen. Dat word ok Pulsstock-, Pullstock- of Paddstockspringen of Fierljeppen (bi de Westerlauwersken Fresen) nöömd.

pikto_pultstockspringen

De Pultstock is en Staak van dree bit veer Meters Lengte un an’t Enn is en lüttje rund Schiev fastmaakt. Dit Enn word in’d Middent van de Sloot steken, waar man over weg jumpen will. De Schiev sörgt daarför, dat de Pultstock neet in d’ Sliek versackt. Denn word düchdig Swung haalt un mit Hülp van de Pultstock over de Sloot sett.

Is de Sloot to breed, so kann man ok – wenn man noog Kracht hett – an de Stock hoog schörtjen un up disse Wies de Wiede verlangern. So kann man ut de Stand teihn Meters un mehr berecken.

Ok in disse Spoortaard gift dat elke Jahr Weddstrieden. Daar proberen dat denn faken ok Lüü ut, de dat noch noit maakt hebben. En lüttje Henwies: De Pultstock neet to wied weg in’d Grund van dat Water steken, anners geböhrt dat gau, dat man neet noog Swung hett…

pikto_pultstockspringen2

Leave a Reply

Your email address will not be published. Required fields are marked *